السبت 04/مايو/2024 - 10:17 ص

كشف المطرب عمر كمال موقفًا حدث معه في بداياته قبل الشهرة إلى جانب حديثه عن موال كان سببا في شهرته وفتحة خير عليه في بدايته.

عمر كمال: مكانش معايا حق البدلة

وقال عمر كمال خلال لقائه مع الإعلامية أميرة بدر في برنامجها خلاصة الكلام: كنت في فترة باخد فيها 200 أو 300 جنيه وكنت بشتغل خميس وجمعة في فرح أو عيد ميلاد ومكانش معايا حق بدلة وكان فيه قاعة فاتحة جديد في السويس وكان فيه درس كود وأني لازم البس بدلة، وأنا مكنش معايا أجيب تمنها.

وأضاف عمر كمال: كانت ظروفي صعبة ولما طلعت من الجيش خدت ورث أبويا وصرفته وأمي قالت لي خلي الغناء ينفعك وشيل نفسك ومش هديك جنيه، ولما روحت الفرح مرضيوش يدخلوني والعريس كان متفق معايا على فيس بوك، لكن مدير القاعة رفض يدخلني وقال لي روح إلبس بدلة.

وأشار عمر كمال إلى أنه بعد هذا الموقف ظل يرتدي بدل زملائه في المناسبات، موضحًا: كنت لما أشوف حد من زملائي لابس بدلة حلوة أقول له تحفة، يقول لي ربنا يخليك اتفضلها، أقول له عندي الخميس فرح ممكن أخدها الأربع منك.

وأكمل عمر كمال: كل صوري بالبدل على حسابي الشخصي في فترة سنة 2013 و2014 مستلفها ومش بتاعتي.

موال غربة فتحة خير عليا

وتحدث عمر كمال عن موقف كان بداية فاتحة الخير عليه قائلًا: عملت موال اسمه الغربة ونزلته على النت واتنشر جدا وبدأ الدنيا تمشي وأول سفرية جات لي كلموني وقالوا لي في كافيه عاوزك في الإمارات واتبسطت قلت هركب طيارة أول مرة، وأنا كنت ذكي ولما روحت هناك شهر واتعرفت هناك على مواطن ابن حلال وخدت الرقم، وظبطت حالي.

وأضاف عمر كمال: عملت مشكلة مع صاحب الكافيه لأنه كان رافض أني اشتغل مع حد تاني وقال لي أنت عامل إقرار وممكن اشتيك وأمنعك من دخول الإمارات فكملت الشهر بالطول والعرض ولما رجعت مصر من حسن حظي المواطن الإماراتي اللي اتعرفت عليه طلع متجوز مصرية ومخلف منها اتنين جه مصر وقال لي أنا بثق فيك وعندي فرح واحد من عيالي عاوزك تمسك لي الفقرات والنمر وتشوف لي قاعة وفعلا حجزت له قاعة في العباسية وفرقة واحد صاحبنا وكان عاوز يديني 15 ألف جنيه لكني رفضت وقلت له عاوز خدمة تانية وطلبت منه يحجز لي فندق أسبوع في الإمارات.

وتابع عمر كمال: لما روحت الإمارات أول مرة كنت حبيت واحدة سورية هناك وكانت شغالة في العقارات وكان معاها عربية وقعدت في فندق وقلت لها ساعديني أدور على شغل وساعدتني وكانت إنسانة كويسة وبتحبني وقعدت لحد ما ربنا كرمني والراجل شاف لي مكان ثابت أغني وعمل لي إقامة، ومن هنا الدنيا ضحكت وعملت فلوس واشتريت عربية على قدي وشقة في المقطم في الأرضي وربنا فتحها فوق ما اتخيل ونسيت التعب.

عمر كمال يوجه رسالة لمن يهاجمه 

ووجه عمر كمال رسالة لكل من يهاجمه: احترم تجربتي علشان احترم تجربتك لأني بشوف شباب بيقول أنا خدت الشهادة، لكن ده مش كفاية لازم تشتغل على نفسك وأنا معايا شهادة دبلوم صنايع واحترم تجربة اي حد تعب وشقي وواحد زي حمو بيكا الحياة ما وفرتش له أنه يتعلم وربنا أراد يرزقه لسبب ما، وهو مش واخد من رزق حد، والبلد مش بتديني دعم وشغلتي عرض وطلب وبدفع ضرائب ودخلت الجيش وعندي 34 سنة.