بعد ما يوم الجمعة العظيمة انتهى، واندفن حبيب العمر في قبر واتقفل عليه، كانوا فاكرين أن خلاص القصة خلصت وخلصوا من المسيح وبتعاليمه اللي كانت مضايقاهم ومخلياهم يفكروا ازاي يقتلوه علشان يخلصوا!

لكن الواقع مكانش أن القصة خلصت ولا انتهت بموته على الصليب ولا حتى بأنه اندفن، لكن القصة لسة فيها أهم فصل هيسطره المسيح في التاريخ، وهو أنه هينزل يحل قيود أبينا آدم وكل أرواح الصديقين والأبرار المحبوسة في الجحيم وكانت منتظرة لحظة الخلاص.

وبقى تذكار نزوله وكسر شوكة الهاوية كل عام مصدر فرح ورجاء وثبات لينا وسط عالم مليان تحديات وخوف وقلق وحاجات بتخلي القلب طول الوقت يفكر هل هيجي الوقت وتخلص ازماتنا الوقتية وضيقاتنا الأرضية زي ما كسر شوكة الهاوية؟.

والحقيقة يا عزيزي أنه أه أكيد هيجي الوقت وهتنتهي شوكة الضيقة، وننور من تاني، وزي ما بنشوف كل عام النور بيخرج من قبره وبيعلن كسره لشوكة الموت قلبك هينور من تاني ويعلن عن مجده في حياتك وعمله المدهش فيها.. المسيح قام.. بالحقيقة قام.
Instagram: @pwagiih