الثلاثاء 07/مايو/2024 - 04:28 م

تحدث المؤلف محمود حمدان، عن أسباب جعل شخصية عرب السويركي التي جسدها الفنان أحمد العوضي، خلال أحداث مسلسل حق عرب، شخصية بطل شعبي لا يقهر، وتوضيح أثر إدمان المخدرات عليه.

وقال محمود حمدان في لقائه مع القاهرة 24: كنا قاصدين أنا وأحمد العوضي، إن كل السادة المشاهدين يقولوا إن عرب السويركي بيضرب الناس، وبيضرب شارع لوحده، وفي الآخر يشوفوا حقنة مخدرات عملت فيه إيه.

وتابع محمود حمدان: حقنة واحدة كسرته وذلته وخلته شبه خيال المآتة، وأنا كنت بضحك لما الناس تتشحن من عرب السويركي إنه بيضرب شارع لوحده، وبعد ما خد المخدرات بقت الناس هي اللي تقول عايزين حق عرب.

محمود حمدان: قصدنا توصيل رسالة الإدمان في مسلسل حق عرب

كما أكد محمود حمدان، هدف مسلسل حق عرب من توصيل رسالة أثر إدمان المخدرات، قائلًا: أنا وأحمد العوضي قصدنا توصيل رسالة الإدمان دي، قولنا هنعمل اللي علينا والباقي على ربنا، وهو ده دور الدراما، ممكن نقدم عمل للتسلية بس يكون حاجة عندنا ورسالة عايزين نقولها.

وأضاف محمود حمدان: والمسؤولين كانوا بيكلمونا يقولولنا قد إيه المسلسل الناس كانت متفاعلة معاه ودي حاجة تخلينا مخضوضين من النجاح، وحاسين بمسؤولية من اللي جاي، ونبقى على قدر ثقة الناس والكلمة بنحاسب عليها.

مسلسل حق عرب

وحقق مسلسل حق عرب، نجاحًا كبيرًا منذ عرض أولى حلقاته في موسم رمضان 2024، وشارك في بطولة العمل كل من: الفنان أحمد العوضي، رياض الخولي، دينا فؤاد، وليد فواز، دنيا المصري، محمد أحمد ماهر، جلال الزكي، زينة منصور، إبراهيم السمان، أحمد صيام، وآخرين، والعمل من تأليف محمود حمدان، وإخراج إسماعيل فاروق.